لا مؤاخدة يا دعبس .. هى المرأة لسه مقهورة ومدبوحة ومتعلقه من رجلها.. ولا خلاص ده زمن وفات ..!!
أنا شايف يا اخوانا ان الست دلوقت عاملة زى القطر القشاش ومبأش فيه خلاص نموذج الست المقهورة ..نموذج ( أمينة) وبرده مبأش فيه نموذج ( سى السيد)
بيتهئلى احنا عاوزين نتكلم شوية عن حقوق الرجاله .. ونعمل لجنة تقصى حقائق علشان نعرف ..يا ترى الست بتضرب جوزها ليه ! يا ترى الست عاملة فيها الشحات مبروك فى البيت ليه ! .. والاهم الخيخة جوزها ده ساكت ليه ! تكنشى يا خويا مسكاله ذله ! .. متعرفش ايه النظام فى الليلة دي .
ويمكن فيه ناس بستغرب هو فيه رجاله بتنضرب .. واقوله اه والله فيه رجاله بتنضرب ومش بعيد يعملوللهم نقابة كمان لتعبر عن القهر والمعاناة بتاعتهم ... وتعالى شوف يا عم الحج مثلا فى موقع نسائي شهير على الانترنت متخصص فى كل قضايا المرأة واحدة بتتكلم بتقول اسمها سلوى 35 سنة، بتقول ست سلوى ايه بالنص : ((زوجي يضربني غير أنني أرد الصاع صاعين، إلا أنه أقوى مني، أدافع عن نفسي بكل ما أجد مثل ملاكمين تتساوى الضربات، وفي الختام يضطر لإنهاء المباراة ))
طبعا احنا ضد ان الراجل يضرب الست الضرب الهبل ده لكن شفنا حالات من دي .. لكن الغريب باه ان الست بتضرب راجل .. بعدين ممكن واحد لا يتخيل مثلا ان ست تقف قدام عضلات راجل وترد له الضربة اتنين والشلوط شلوطين والقفا قفايين .وإن كان ده فعلا بيحصل... بس فيه نوع من الستات مش بيقدر يقف قدام الراجل وقوته .. فشوف بأه يا عم الحج علشان تحترس وتعرف ان كيدهن عظيم .. واحدة يا سيدى نفسها تطلع غلها فى جوزها وتشفى غليلها بس للاسف مش قادرة لا تديله شلوط ولا بونيه فى مناخيره .. قوم تعمل ايه ! .. تستنى الراجل لما ينام ويروح فى سابع نومة وتربط رجليه بالحبال وتكتفة فى السرير وتجيب عصاية أو خرزانة وتنزل ضرب فى جتتة جوزها اللى ممكن صريخة يصحى عمارة بحالها من كتر الالم .. بس على فكرة هى واعيه برده مهو حيصرخ ويعمل قلق..فعلشان ده ميحصلش فتقوم قبل ما تضربه تكمم فمه بفوطة ولا حتى ببلاستر علشان ميبأش خلاص ليه ديه .. !
واحدة تانية بتتكلم برومانسية وبرقة شديدة وبتعلن للكل انه رغم عنف زوجها ضدها بس هى مش بتقدر ترد العنف بالعنف وده لان اعصابها متتحملش انها تشوف قطة بتتعذب فما بالكم بأه وده جوزها ! .. طيب بتعملى ايه يا ست الرومانسية والحنية كلها ..فتحكى إنها بتحطله منوم فى الشاى ولما ينام ويفقد الوعى تنزل فيه ضرب بالشبشب مع كام قلم على كام قفاااااا وبكده تشفى غليلها وفى نفس الوقت ميتألمش قدامها لانها بصراحة مش بتستحمل تشوف حد بيتعذب قدامها .. يا سلام قلبها قلب خصاية !
طيب يا اخوانا .. هو اساسا يعنى المرأة بتحب العنف ولا دى فرة وجت للستات ! .. وانا شايف اساسا ان عنف الست ده ضد الراجل اساسه ان الراجل سايق البلطجة عليها .. يعنى يطلع غلبه وهمه فيها بالضرب فتلاقيها مجبرة انها تديله ومترحمهوش .. تقوللى ما هو كان زمان برده الراجل بيضرب الست ومكنتش بترد وكانت كافيه خيرها شرها .. اقولك الزمن اتغير والعنف بأه سمة المجتمع كله نتيجة حاجات كتير أوى .. والاهم من كده هو كسر الحاجز النفسى اللى بين الراجل والست .. اصل الراجل راجل والست ست .. لو كانت الست فى الخطوبة مثلا بتدى خطبها على قفاه .. تتوقع ازاى يكون مثلا معاملتها ليه بعد الجواز ! .. واذا كان البنت بتتطاول باللسان على خطيبها قبل الجواز حتى ولو كان بالهزار ازاى حتعاملة بعد الجواز ..
فالراجل المرمطون أو خيال المأته هو سبب المعاناه دى كلها ، الراجل اللى هو اصلا ملهوش كلمة فى بيته زى الريس حنفى بالضبط (( خلااااااااااااااص حتنزل المراااااااااادي)) بس على فكرة (( اعملى حسابك المرة الجاية لا يمكن تنزل ابدا ))
وفى نفس الوقت يا جماعة فيه رجاله فعلا اغبياء .. رجاله مش بيعرفوا يعاملوا الست ازاى .. الراجل هو اللى ممكن يعمل من الست (جوليت) وهو برده اللى ممكن يعمل من الست ( نادية مزلقان ) .. حتى ولو كانت الست دى بتقول ريان يا فجل وملهاش فى حاجه .. لكن عمر ابدا البلطجة ما تجيب حل .. فالعلاقة الزوجية مش ماتش بوكس ولا حلبة مصارعة .. ولو انت مش طايقها ولو هى مش طيقاك خلاص ننزل ستارة النهاية مع اغنية ( اودعك) وتخلص الحكاية ..لكن لو انت يا عم راضى بالبهدلة مش حلوم على الست وحقولك تعيش وتاخد غيرها !
الإثنين يوليو 14, 2008 3:23 pm